| Jan | FEB | Mar |
| 05 | ||
| 2012 | 2013 | 2014 |
COLLECTED BY
Collection: Wide Crawl Started January 2013
L'Induisimu (सनातन धर्म; Sanātana Dharma = "Eterna legge murale") hè cunsideratu nurmalmente cum'è a più antica frà e grande riligione di u mondu. L'Induisimu hè caratterizatu da parechji sistemi di cridenze, pratiche è scritture. E so urighjine sò assai antiche è si rifiriscenu à a cultura Vedica. Hè a terza riligione di u mondu per numeru di praticanti (1,05 miliardi di persone, u 96% di i quali in l'India).
Cuntenutu |
L’Induisimu hè cumpletamente sfarente di e religioni chi no cunuscemu. Ùn si pò separàlu di speculazione filosofica è di a vita suciale (classe, caste, modi di vita). Hè d’apressu à tuttu què ch’elli s’imponenu u duvere suciale è l’imperativu murale (d’essenza religiosa). U dharma hè a legge murale, u meritu religiosu, l’ordine chi stabilisce tuttu ; hè a listessu tempu più è menu cà u nostru tarmine di « religione », ma chjè l’unica parola chi u possa traduce.
À dilla franca, si nasce induistu, omu ùn pò micca diventallu parchì a condizione hè leata à i quadri generali di a vita indiana.
L’Induisimu hè fattu d’acquisti diversi.
Si pudarìa pinsà chi l’Induisimu hè finalmente un mischju di culti elementarii senza leame incù u Vedìsimu. Ma pè una religione, ùn importanu tantu i sò elementi custitutivi : importa di più u sistemu novu ch’ella crea. E malgradu tutte l’analogìe incù altre forme di cultu, l’Induisimu hè un fattu cumpletamente originale, unicu.
U panteone hè vastu. Cada figura divina hè à pocu pressu indipendente. S’ellu si cunsidera tutta a mitulugia, pudemu identificà 8 dei maiori chi sò più ò menu i « guardiani di u mondu », di origine vedica.
Ci sò tanti altri dei, ò gruppi di dei. A mitulugia induista ha sempre assimilatu credenze, conti, forme divine senza supprìmeli (ò raramente).
L’aspettu principale di mitulogia indiana classica hè a coesistenza, nantu à listessu nivelli teoricu, di trè dei principali : Brahmà, Vishnù, Scivà. Sta trinità hè chjamata trimurti in Sanscrittu (« e trè forme »).
Brahmà ripresenta l’elementu creatore è ùn riceve micca adurazione particolare, nè cultu spiciale : ci hè un unicu tempiu dedicatu à Brahmà in tutta l’India ! (in Pushkar). Brahmà hè statu simile à a nuzione astratta originale ch’ellu ripresenta. À u cuntrariu, Vishnù è Scivà si spartenu a massa di i fideli. In parechje sette, equivalenu à l’Esse Supranu. L’opposizione tra sti dui dei, assai marcata in la literatura, hè debule ò inesistente in la pratica religiosa cuncreta.
Vishnù hè sopratuttu vistu cum’è beneficu è bravu (ancu s’ellu tene dinò qualchi aspetti temevuli). Hè ripresentatu incù quatru attributi fundamentali : a conca, u discu, a massa è u lotu. Ma a sò mitulogia ùn hè tantu ricca : hè sopratuttu un diu durmendu, chjinatu nantu à a sò sarpe « infinita » Scescià à i mile capi. Medita, è quand’ellu si sparte, sorte da u sò billicu un lotu da duve sorte Brahmà pè créa un universu novu. Certe volte, hè ripresentatu nantu à a sò agula Garudà (chi tene u sùo propiu cultu). Tene diversi nomi : Ranganatha, Venkatescià, Tirupatì, Vithobal, Naraianà... U sò statutu di deus otiosus (diu supranu è ritiratu) l’obliga à delegà i sò puteri à diversi persunaghji. I più famosi sò l’avatara (« falate »), incarnazioni di Vishnù in lu mondu terrestre. I primi avatara sò teriomorfi (pesce, cuppulata, cignale...), po diventanu misti (omu-leone). L’ultimi avatara, i più famosi, sò antropomorfi : Ramà è sopratuttu Krishnà.
Scivà, u destruttore, hè più ambivalente : hè assimilatu à a morte, u tempu. Ma hè dinò « u beneficu », chi presede à i ghjochi sessuali è à a procreazione. A figura di Scivà « rè ballandu » incù e sò bracce multiple hè carcata di simbuli cosmichi. Hè dinò u prutettore di l’opere artistiche, ò l’asceta chi medita nantu à l’Himalaya. A sò cavalcatura hè u toru biancu Nandin. I sò avatara sò aspessu femini.
Ci sò divinità femine in tutta a ierarchia induista. À u nivellu più bassu, ci sò e gramadevatà, dee campagnole, guasgi sempre femine. Ripresentanu quantunque à pocu pressu 75% di u cultu, sopratuttu in India meridionale. Po ci sò e "madre", spusate di i dei è tutte e sò forme. E più famose sò Satì a sposa fedele, Parvatì "figliola di a muntagna", Umà a benefica, Durgà l'inaccessibile, Candì a viulenta, Lakshmì a bellezza... Esiste dinò una populazione di dee aspessu cattive, e matricà (e "chjuche madre"), demone ò ogre chi pussedenu i zitelli è purtanu e malatie.
Ind’e speculazioni indiane, u diu supranu ùn hè necessariamente creatore. È u diu creatore l’hè di manera astratta. Parchì creò ? Pè ghucà (lilà : "ghjocu"). In la cosmolugia, tuttu principia incù a prakriti, ò materia primitiva. Hè un continuum materiale chi porta in sè i trè composanti :
U mischju di sti trè principii, incù sfarente misure, compone u mondu fenomenale, fisicu è psichicu. Di stu mischju nascenu i cinqui elementi-primi (l’èteru, l’aria, u focu, l’acqua, a terra) chi costituiscenu l’ « ovu di Brahmà », vale à dì l’universu. In certe duttrine, tuttu cumincia incù Brahmà.
L’ovu cosmicu (brahmanda) hè spertutu in duie metà. A metà superiore hè cumposta da sette pisi celesti. A metà inferiore dinò (u pisu più bassu sò l’inferni, u Naracà). À mezu à i pisi celesti è à i pisi sottuterranii, ci hè u mondu terrestre : un discu chi tene u Monte Merù cum’è centru.
Retrieved from "http://co.wikipedia.org/w/index.php?title=Induisimu&oldid=313816" Categuria: ●Religione
