Агәалашәареи аџьабареи рымш — ацәылашамҭаз, рашәарамза 22, 1941 ш. рзы афашисттә Германиа Асовет Еидгыла иақәлоит. Афашисттә Германиа иалагеит ахықәкы нагӡара: Асовет Еидгыла аԥыхра, миллионҩыла ауаа рҭархара, СССР ажларқәа рытәтәра. Иалагоит, адунеитә ҭоурых аҿы зегь реиҳа ишьаарҵәыраз, 1418 мши ҵхи ицоз аибашьра. Асовет жәлар рыԥсы ахҭынҵаны ари аибашьраҿы иаиааиуеит. Урыстәыла Афедерациа Атәылахьчара адыррақәа рыла Аџьынџьтәылатәи еибашьра аан Асовет Еидгыла иацәыӡуеит 26 млн. 600 нызқь-ҩык ауаа – урҭ рахьынтә - 8 млн. 660 нызқьҩык аруаа. Ари ҳауаажәлар акыр абиԥарақәа иазгәарҭо агәалашәареи аџьабареи рымш, миллионҩыла ауаа рыԥсҭазаареи рлахьынҵеи зҿаҟәаз мшуп. Аџьынџьтәылатәи еибашьра Дуӡӡа 1941-1945 шш. афронтқәа рҿы еибашьуан 55 нызқьҩык Аԥснытәи ауааԥсырагьы, урҭ рахьтә ихнымҳәӡеит 17 ныз.инареиҳаны.
